حجية اشلونك .. معاك د. بومشاري
الحمد لله .. زينة
شسمج ؟
حصة ناصر
انتي وين الحين
وين بعد .. بالمستشفى ..من خمسين سنة وآنا اتعالج فيه و حتى زوجي المرحوم
اتعرفين منو آنا
لأ .. ما عرفك
انزين آنا شنو اشتغل؟؟
اشدراني عنك .... انت قاعد منيه
شوفي البالطو الأبيض اللي علي .. يعني شنو اشتغل
لا اتدوخني .. ما أدري.
حجية جم عدد اعيالك
خير من الله
قولي اساميهم لي
هو هو .. اشتبي فيهم
ابي اختبر ذاكرتج
عندي 8 .....5 أولاد و 3 بنات
الله ايخليهم لج ... شنو اساميهم
العود ..عبداللة
و ناصر
و حسين اللي ما انشوفه الا بالسنة مرة
وعبداللة
والصغير ..يوسف
ها اشتبي بعد
بعد واحد نسيتيه
ولدها اللي كان معاها ... يما وآنا
حجيه منو هذا اللي ياي معاج؟
واحد من أهل اللة
اي يعني شيصيرلج
أخوي فهد
يما آنا ولدج وليد .. خالي فهد مات من 20 سنه!!!
حجيه .. وبناتك
فاطمة
و مريم
والثالثه نسيت أسمها
ولدها .. يما شنو أسامي عيالي اللي معاج بالبيت
وآنا اشدراني ... آنا يالله اتذكرت أسامي اعيالي
حجية شسم ديرتنا اللي عايشين فيها؟؟
ديرتنا الكويت .. اشلون انساها
وشيخنا شسمه
الله ايعزهم الصباح
وشنو اسم شيخنا
عبداللة السالم!!!
ولدها ... يما الشيخ صباح اشلون تنسينه!!
كلهم واحد الله ايخليهم لنا
حجيه وين بيتكم
بالمطبه!!!!
ولدها ... يما بيتنا مو بيت يدي الله يرحمه
اي بالمطبه يم بيت أبوسعود
واستمر الأختبار.....
وتبين بأن الحجية تعاني من الخرف
وتم تشخيصها بمرض الزهايمر
ووصفنا لها العلاج المناسب ... وحتى لو لم يرجع لها ذاكرتها
ولكن بالتأكيد سيحافظ على ما تبقى منها
وكذلك تم وصف دواء لتهدئتها ولمساعدتها بالنوم

حجيه انشوفج بعد شهر ان الله أحيانا
مع السلامه .... دوختنا بأسئلتك!!

ملاحضة: تم تغيير اسم الحجيه حفاظا للسريه.

وسؤال طبيبك : ما المعلومات التي لديك عن الخرف؟؟وهل تعتقد بأنها كافيه؟؟


Posted by Dr Aref Alabbasi الأحد، 18 أكتوبر، 2009

14 comments

  1. SHOOSH Says:
  2. هممممم

    الخرف يعني لما خلايا المخ تموت

    لما المخ يتخربط و تدش الوظايف كلها في بعض

    لما تدش الذكريات عرض بالواقع أوالوقت الحالي

    لما الواحد يقط خيط و خيط

    ما يقدر يتواصل عدل

    يفقد الذاكره يمكن

    مادري وايد أشياء

    بس أهوا غالبا يحوش كبار السن

    او اللي يعصبون وايد يمكن يخرفون أبجر

    و الحجيه دمها خفيف

    :)

    الله يشافيها

     
  3. يقال بأن من يمرن ذهنه على الانشغال بالقراءة والشأن العام ومتطلبات الحياة المهنية والعملية يكون محصناً من الخرف أو الزهايمر ، ولكن العجيب أن رونالد ريغن ومارغريت تاتشر وهما أعظم رأسين مشغولين بمهمات لانهاية لها أصابهما الزهايمر!!
    والسؤال : إذن ماذا يفعل الإنسان العادي ليقي نفسه من هذه النهاية المؤلمة، ويحافظ على ثباته وعقله إلى نهاية عمره؟

     
  4. Kuwait10 Says:
  5. يقولون إن الأبحاث أثبتت إن الإسبرين زين للوقاية من الزهايمر.

     
  6. C'est La Vie Says:
  7. كانت عندنا بالعايلة حالة الزهايمر
    كانت دايما معصبة وتتشكى من الكل انهم ما يحبونها ويبون يأذونها
    بس دكتورنا سؤال
    شنو اسباب هالمرض؟
    وهل ممكن يكون وراثي ؟

     
  8. SHOOSH
    كل كلامك صح ، ولكن لايوجد علاقة بين العصبية والزهايمر

     
  9. عين الصقر
    للوقايه من الخرف يجب علينا استخدام عقولنا دائما فدكاترة الجامعة أقل الناس اصابة بالزهايمر.
    لذلك يجب علينا القراءة و حل الكلمات المتقاطعة و حفظ الأرقام و اسئلة المعلومات العامة بالأضافة للأكل الصحي

     
  10. Kuwait10
    الأسبرين و بقية الأدوية المشابهه له اثبتت بانها تقلل من الأصابة بالزهايمر

     
  11. C'est La Vie
    غير معروفه اسباب الزهايمر و للوراثة دور بسيط بالمرض

     
  12. عندي يدتي الله يحفظها لاحظت انها تخربط بالاسامي لمه تنادينا بس تصلح على طول عقبها مثلا تنادي اسامي احفادها بالغلط بأسامي احفادها اللي اكبر منهم , بس ليلحين مثبته احداث الكويت ايام قبل وسوالف الفريج

     
  13. غير معرف
    اذا كان عمر جدتك اكبر من 65 سنة انصح بعمل اختبار للذاكرة لها

     
  14. Flona Says:
  15. :(
    المرض قاسي و يخرع
    اشلون يكون حال الأنسان من بعد كل هذا الكم من العلوم و المعرفة ينسى حتى عياله.
    هل مرض مألم على الأبناء لانهم يشوفون اغلى الناس عندهم مايعرفونهم و يسلمون عليهم كأنهم غريبين.

    جدتي الله يخليها ماتعرف احد كلششششششش
    و متضاايقة
    و عصبية
    و كله تبي تطلع
    و فقدت الإحساس بالوقت
    تقوم الساعه 3 الفجر تحن تحن تحن تبي الكل يقوم و يطلعها

    و صارت مثل الطفله بالضبط
    الله يشفيها

     
  16. Flona
    اهم شيء بعلاج الجدة هو كيفية التعامل معها.... اللة ايعينكم

     
  17. حالة أصيبت بالزهايمر بالرغم من أنها كانت دائمًا منشغلة بالقراءة وحل الكلمات المتقاطعة بالذات وكانت مثقفة بمعنى الكلمة ولكن السبب أنها وقعت مرتين مغمى عليها أو هكذا ظنوا وشخصوا حالتها هبوط! وبعد فترة تدهورت ذاكرتها ونفسيتها تم إجراء فحوصات لها بالخارج اتضح أنها عانت من جلطة بالمخ مرتين ولم يعالجها أحد بالكويت وقالوا فقط هبوط! وألحين الله يرحم حالها ويبارك بعيالها

     
  18. غير معرف
    ما أصاب قريبتك عباره عن خرف بسبب الجلطات الصغيره المتكرره و ليس بمرض الزهايمر

     

Subscribe here